அபூர்வ ரசனையாளர் ஆல்பர்ட் -மண்குதிரை -jeyakumar.r@thehindutamil.co.in

COMMENT   ·   PRINT   ·   T+  

1

பழந்தமிழ் இலக்கியத்தின் பள்ளியாகத் திகழ்ந்தவர் ரசிகமணி டி.கே.சி. அவரது ‘வட்டத் தொட்டி’ என்னும் இலக்கிய அமைப்பு தமிழ் அறிஞர்கள் பலர் உருவாகக் களம் அமைத்துக் கொடுத்தது. டி.கே.சி. போல் பின்னாளில் நவீனத் தமிழ் இலக்கியத்தின் சிந்தனைப் பள்ளிகளுள் ஒன்றாக விளங்கியவர் பேராசிரியர் எஸ். ஆல்பர்ட். இவரது கலந்துரையாடல்கள் அடுத்த தலைமுறை ஆளுமைகள் பல உருவாகக் காரணமாயின.

டி.கே.சி பழந்தமிழ் இலக்கியத்தின் அருஞ்சுவையைக் குன்றாமல் எடுத்துச் சொல்லக்கூடிய ஆற்றல் உள்ளவர். அதுகுறித்த தன் ரசனையைக் கட்டுரைகளாக எழுதியிருக்கிறார். ஆனால், படைப்பு என்று எதுவும் எழுதியதில்லை. அதேபோல நவீனத் தமிழ் இலக்கியத்தின், நவீன சினிமாவின் ரசனை அனுபவத்தைச் சுவைபட எடுத்துரைக்கக்கூடியவர் ஆல்பர்ட். இவரும் படைப்பு என்று எதுவும் எழுதியதில்லை. இந்த வகையில் பேராசிரியரை நவீன இலக்கியத்தின் டி.கே.சி. எனலாம்.

குற்றாலக் குறவஞ்சியிலும் கம்பராமாயணத்திலும் பொதிந்திருக்கும் சுவையை டி.கே.சி. விளம்புவதுபோல நகுலன், சுந்தர ராமசாமி, ஞானக்கூத்தன் ஆகிய நவீனக் கவிகளின் கவிதானுபவத்தைச் சித்திரமாக எழுப்பிக் காட்டக்கூடியவர் ஆல்பர்ட். ஆங்கிலப் பேராசிரியராக இருந்தபோதிலும் பழந்தமிழ் இலக்கியத்தின் சுவை அறிந்தவராகவும் இருக்கிறார்.

எஸ். ஆல்பர்ட் திருச்சி ஜமால் முகமது கல்லூரியில் ஆங்கிலப் பேராசிரியராகப் பணியாற்றியவர். நாற்பதாண்டு காலம் இலக்கிய நல்லாசிரியராக விளங்கிய இவர் தற்போது சென்னையில் வசிக்கிறார். எம்.டி. முத்துக்குமாரசாமி, அம்ஷன் குமார், வெளி ரங்கராஜன், இமையம், ராஜன்குறை, கோ. ராஜாராம், நாகூர் ரூமி, ஜே.டி.ஜெர்ரி போன்ற ஆளுமைகள் உருவாகக் காரணமாக இருந்தவர். அவரது பங்களிப்பைக் கவுரவிக்கும் வகையில் அவரது மாணவர்களில் ஒருவரான எஸ். அற்புதராஜ் பேராசிரியர் ஆல்பர்ட் குறித்த தொகுப்பு நூலைக் கொண்டுவந்திருக்கிறார்.

இதில் தொகுக்கப்பட்டுள்ள அவரது கட்டுரைகளின் மூலம் பேராசிரியரின் பன்முக ரசனை வெளிப்படுகிறது. இலக்கியம் அல்லாமல் சினிமாவிலும் ஓவியங்களிலும் ஆர்வமும் அறிவும் உள்ளவராகவும் பேராசிரியர் இருந்துள்ளார். 

வங்கத்தின் `புதிய அலை சினிமா'வை தன் எழுத்தின் மூலம் தமிழுக்கு அறிமுகப்படுத்தியுள்ளார். சத்யஜித் ராயின் தீவிரமான ரசிகராக அறியப்படும் ஆல்பர்ட் ‘சாருலதா’ குறித்து நுட்பமான கட்டுரை ஒன்றை எழுதியிருக்கிறார். ஓவியத்தின் நுட்பங்கள் குறித்த அவரது ஆழமான பார்வை அவரது கட்டுரைகள் மூலம் வெளிப்பட்டுள்ளது. நாடகங்கள் குறித்தும் எழுதியுள்ளார்.

முத்தமிழ் இலக்கியத்தையும் பேசும் பேராசிரியரின் இந்தத் தொகுப்பில் நவீனக் கவிதையியல் குறித்த கட்டுரைகள்தான் அதிகமாக இருக்கின்றன. அவர் நவீனக் கவிதையின் போக்கை நுட்மாக அவதானித்துவந்ததை இதன் மூலம் அறிந்துகொள்ள முடிகிறது. எது கவிதை, தமிழ் நவீனக் கவிதைக்கான இலக்கணங்கள் எவை என அவர் ஆங்கில மரபை முன்வைத்து விளக்க முற்படுகிறார். சொல்லுக்கு அப்பால் செல்லும் நவீனக் கவிதையின் சித்திரத்தை, ‘சூளைச் செங்கல் குவியலிலே/ தனிக் கல் ஒன்று சரிகிறது’ என்ற ஞானக்கூத்தனின் கவிதையைக் கொண்டு எழுப்பிக் காட்டுகிறார்.

தமிழ்க் கவிதைக்கு எழுபது மிக முக்கியமான காலகட்டம். ஆத்மாநாம், சுகுமாரன், ஆனந்த், கலாப்ரியா, கல்யாண்ஜீ, கோ.ராஜாராம், தேவதச்சன், தேவதேவன் எனப் புதிய படையே கிளம்பி வருகிறது. அந்தக் காலகட்டத்தின் கவிதைகளை மதிப்பிட்டு ‘எழுபதுகளில் தமிழ்க் கவிதை’ என்று எழுதியிருக்கிறார். ஒரே ஒரு தொகுப்புடன் எழுதாமல் விட்டுவிட்ட நாரணோ ஜெயராமன் கவிதையையும் குறிப்பிடுகிறார்.

அந்தக் காலகட்டத்தில் உருவான வானம்பாடிக் கவிதைகளைக் குறித்துச் செறிவாகக் கட்டுரையில் மதிப்பிடுகிறார். ‘எழுபதுகளில் கவிதையில் நிகழ்ந்த ஒரு உரத்த நிஜம் வானம்பாடிகள்’ என்கிறார். அவர்களின் கவிதைகள் நேரடியாக இருந்ததற்கான காரணங்களை சமூகப் பின்னணியிலிருந்து அலசிப் பார்க்கிறார்.

பேராசிரியர் குறித்துத் தமிழின் முக்கியமான ஆளுமைகள் எழுதிய கட்டுரைகளும் இதில் தொகுக்கப் பட்டுள்ளன. அவற்றில் எஸ்.வி. ராஜதுரை, எம்.டி. முத்துகுமாரசாமி, அம்ஷன் குமார், ராஜன்குறை ஆகியோரது கட்டுரைகள், பேராசிரியரின் ஆளுமை குறித்த துல்லியமான மனச் சித்திரத்தை உருவாக்கு கின்றன.

பேராசிரியரின் கட்டுரை மொழி சிநேகமானது; எடையற்றது; உள்ளடக்கத்தில் செறிவுடையது. சுருங்கச் சொல்லுதல் என்பதையும் இந்தக் கட்டுரைகள் மூலம் உணர முடிகிறது. எழுத்துகள் மிதமிஞ்சி உற்பத்திசெய்யப்படும் இந்தக் காலகட்டத்தில் பேராசிரியரின் இந்தக் கட்டுரைகள், வாசிப்புக்குச் சுவை கூட்டுகின்றன.

ஆல்பர்ட்டின் கட்டுரையிலிருந்து…

பிரெஞ்சு மொழி எழுத்தாளன் காம்யு (Camus) ஒரு சினிமாவில் உட்கார்ந்திருக்கிறான். பக்கத்தில் ஒரு பெண்; அருகில் கணவன். திரையில் கதாநாயகன் படும் துயரங்களை கண்ணீர் வடிக்கிறாள் மனைவி. அழுகையை நிறுத்துமாறு மன்றாடுகிறான் கணவன். கண்ணீருக்கிடையில் அவள் சொல்கிறாள், “சற்று விடுங்கள் என்னை, அழுது தீர்த்துக்கொள்கிறேன்” என்று. இந்த நிகழ்ச்சியைத் தன் குறிப்புப் புத்தகத்தில் எழுதி வைத்த காம்யு, இதைப் பற்றிய தன் எண்ணங்களை நமக்குச் சொல்லவில்லை. நமக்கு என்ன படுகிறது?

1.பொது இடத்தில் நாலுபேர் மத்தியில் அழலாமா என்று அவள் கவலைப்படவில்லை.

2. கணவனை அருகில் வைத்துக்கொண்டு யாரோ ஒரு அந்நியக் கதாநாயகனுக்காகக் கண்ணீர் விடுகிறோமே என்று அவள் வெட்கப்படவில்லை. மாறாக ‘இன்னும் கொஞ்சம் அழுதுகொள்கிறேன்’ என்கிறாள்.

 3. ஏதோ அழுது சுகங்காணவே சினிமாவுக்கு வந்திருப்பாள் போலிருக்கிறது.

இந்தக் குறிப்பில் வேடிக்கைதான் தொனிக்கிறது… இந்தப் பெண்ணுடைய அனுபவம் விநோதமானது. இவள் பிறனுக்காக அழவில்லை. தனக்காகத்தான் அழுதுகொண்டாள். தன்னுடைய துயரங்களை நினைத்துக்கொண்டிருக்கலாம் என்று சொல்லக் கூடாதா? சொல்லலாம். ஆனால், இந்தப் பெண் தனக்காக அழுதாலும்கூட இவள் தன் அயலானில் தன்னைக் கண்டிருக்கிறாள். இப்படி ஒருவரில் ஒருவரைக் கண்டு ஒருவரில் ஒருவர் கலந்து எல்லாம் தன்மயமாகும் வாழ்க்கை அனுபவம் இனியது.

பேராசிரியர் எஸ். ஆல்பர்ட் 

தொகுப்பாசிரியர்: எஸ். அற்புதராஜ் 

வெளியீடு: மலைகள் பதிப்பகம், 119 முதல் மாடி, 

கடலூரி மெயின் ரோடு, அம்மாப்பேட்டை 

சேலம்-636 003. விலை ரூ. 250. 

தொலைபேசி: 89255 54467

- மண்குதிரை 

தொடர்புக்கு: jeyakumar.r@thehindutamil.co.in

நன்றி :- தி இந்து

கையளவில் கவிதை உலகு

2

புத்தகத் தயாரிப்பில் கற்பனை அதிகமில்லாமல் ஒரே மாதிரியான வடிவத்தில் புத்தகங்கள் வந்துகொண்டிருக்கும் நேரத்தில் உள்ளங்கையளவு ஒரு குட்டிப் புத்தகம் வெளிவந்திருக்கிறது. ‘புள்ளி’ என்பது இதன் பெயர். நவீனக் கவிதையுலகின் முக்கியமான ‘புள்ளி’களின் கவிதைகள் இதில் இடம் பெற்றிருக்கின்றன. க.நா.சு, நகுலன், ஞானக்கூத்தன், கல்யாண்ஜி, கலாப்ரியா, பாலகுமாரன், நா. ஜெயராமன் முதலான கவிஞர்களின் நறுக்குத் தெறித்தாற்போன்ற குறுங்கவிதைகள் கைக்குள்ளும் மனதுள்ளும் சலசலக்கின்றன.

விருட்சம் வெளியிட்ட இந்தப் புத்தகத்தின் விலை 5 ரூபாய்தான். கூடுதலாக, ஆதிமூலம் மற்றும் சிதம்பரகிருஷ்ணன் ஆகியோரின் கோட்டோவியங்களும் இருக்கின்றன. புத்தகம் கிடைக்குமிடம்: டிஸ்கவரி புக் பேலஸ், தொலைபேசி 9940446650.

நன்றி :- தி இந்து

சென்னை பதிப்பகத்தாருக்கு நேதாஜி சுபாஷ் சந்திரபோஸ் எழுதிய கடிதம் - பி.கோலப்பன்

நேதாஜி சுபாஷ் சந்திரபோஸ் (கோப்புப் படம்)

நேதாஜி சுபாஷ் சந்திரபோஸ் சென்னையைச் சேர்ந்த பதிப்பாளர் ஒருவருக்கு ஆஸ்திரியாவிலிருந்து எழுதியிருந்த கடிதத்தை மேற்கு வங்க அரசு வெளியிட்டது. இதன்மூலம் தமிழ்நாட்டுடன் அவருக்கிருந்த தொடர்பை மேற்குவங்க அரசு புலப்படுத்தியுள்ளது.

போஸ் எழுதிய 'தருணர் ஸ்வப்னா' (The Dream of Youth) மற்றும் 'நியூடேனெர் சந்தான்' (Search for the New) ஆகிய இரு நூல்களும் மொழிபெயர்த்து வெளியிட அலயன்ஸ் பதிப்பகத்தைச் சார்ந்த வி.குப்புசாமி அய்யருக்கு சம்மதம் தெரிவித்து டிசம்பர் 27, 1937ல் சுபாஷ் சந்திர போஸ் எழுதிய கடிதம் இது.

இதில் நவம்பர் 8ல் எழுதப்பட்ட குப்புசாமி அய்யரின் கடிதத்திற்கு பதில் எழுதுவதற்கு தாமதமானாதற்காக மன்னிப்புக் கோரலையும் போஸ் குறிப்பிட்டிருந்தார்.

‘The Dream of Youth’ என்ற நூல் 'இளைஞர்களின் கனவு' என்ற தலைப்பிலும்,‘Search for the New’ என்ற நூல் 'புதுவழி' என்ற பெயரிலும் வெளியானது. நேதாஜி எழுதிய கடிதங்களின் தொகுப்பைக் கொண்டதுதான் 'இளைஞர்களின் கனவு'. கல்கத்தாவில் உள்ள சாஹித்ய சமாஜ் என்ற இலக்கிய அமைப்பில் அவர் ஆற்றிய உரைகளை உள்ளடக்கியது 'புதுவழி'.

வங்கமொழியில் நன்கு தேர்ச்சிபெற்ற நாவலாசிரியரும் எழுத்தாளருமான த.நா.குமாரசாமி மற்றும் அவரது சகோதரர் த.நா.சேனாதிபதி ஆகிய இருவரும் இவ்விரண்டு நூல்களையும் சிறப்பாக மொழிபெயர்த்திருந்தனர்.

த.நா.குமாரசாமி ரவீந்திரநாத் தாகூரை விஸ்வபாரதி பல்கலைக்கழகத்தில் சந்தித்தார். அவர் வங்கமொழி மட்டுமின்றி பல மொழிகளையும் கற்றவர்.

எனவே தாகூரின் எழுத்துக்களையும் தமிழில் மொழிபெயர்க்கும் பணிக்காக அவரை நேரில் சந்தித்தார்.நேதாஜி 1939ல் சென்னை வந்திருந்தபோது, திருவல்லிக்கேணி பாரதி சாலையில் அமைந்துள்ள, இன்று 'காந்தி பீக்' என வழங்கப்படும் பிரமாண்ட வீட்டில் வைத்து குப்புசாமி அய்யரின் மகன் கே.வி.எஸ்.மணி மொழிபெயர்க்கப்பட்ட நேதாஜியின் நூல்களை அவரிடம் காட்டினார்.

பிரிட்டிஷ் அரசு என் பாட்டனார், நேதாஜியின் எழுத்துக்களை புத்தகங்களாக வெளியிட்டதை எப்படியோ அறிந்துகொண்டது. ஆனால், அவர்கள் நடவடிக்கை எடுப்பதற்கு முன்பே இலங்கை, சிங்கப்பூர் மற்றும் மலேசியா ஆகிய நாடுகளுக்கு நூல்கள் அனுப்பப்பட்டுவிட்டன. மலேசியாவில் இந்நூல் மறுமுறை பிரசுரம் செய்யப்பட்டது என்கிறார் குப்புசாமி அய்யரின் பேரன் வி.ஸ்ரீனிவாசன்.

சாதாரண உடையில் வந்த பிரிட்டிஷ் அரசின் காவலர்கள் குப்புசாமி அய்யரை அணுகியபோது, புத்தகங்கள் இலேசான தாளில் இருந்ததால் தான் அச்சடித்த புத்தகங்களை அனைத்தையும் அவர் உடனே எரித்துவிட்டார். புத்தகங்கள் எல்லாம் எரிந்ததனால் உண்டான புகைக்கரியின் எச்சங்கள் எங்கள் வீட்டின் சுவர்களின்மீது பல ஆண்டுகள் படிந்திருந்தன. இந்த மொழிபெயர்ப்பு நூல்களே தமிழகத்தில் பெரும்பாலோர் நேதாஜி ஆரம்பித்த இந்திய தேசிய ராணுவத்தில் சேர்ந்து போராடுவதற்கு உந்து சக்தியாய் இருந்தன என்கிறார் அலயன்ஸ் பதிப்பகத்தின் ஸ்ரீனிவாசன்.

தமிழில்: பால்நிலவன்

பொள்ளாச்சி டாக்டர் நா. மகாலிங்கம் மொழிபெயர்ப்பு மைய’ம்

தமிழை யார் எடுத்துச் செல்வது? -சாரு நிவேதிதா

பொள்ளாச்சி டாக்டர் நா. மகாலிங்கம் மொழிபெயர்ப்பு மைய’த்தின் மூலம் ஆண்டுதோறும் நூறு அயல்மொழி நூல்கள் தமிழில் மொழிபெயர்க்கப்படவுள்ளது பற்றிய செய்தியை ‘தி இந்து’ செப்டம்பர் 26 இதழில் கண்டேன். மிகவும் வரவேற்கத்தக்க பணி. பாரதி தொடங்கி வைத்த இந்தப் பணியை க.நா.சு. தீவிரப்படுத்தினார். நிறுவனங்களும் பல்கலைக்கழகங்களும் செய்ய வேண்டிய அந்தப் பணியை க.நா.சு. ஒருவரே நின்று ஆயுள் பூராவும் செய்தார். அவர் செய்ததைத் தொடர்ந்து இன்று பல மொழிபெயர்ப்பாளர்கள் ஆங்கிலத்திலிருந்து ஏராளமான அளவில் தமிழில் மொழிபெயர்த்துக்கொண்டிருப்பதையும் நாம் அறிவோம். உலக அளவில் பிரபலமான எந்த எழுத்தாளராக இருந்தாலும் அல்லது, பிரபலம் ஆகாத தாஹர் பென் ஜெலோன் (மொராக்கோ) போன்றவர்களாக இருந்தாலும் அவர்களின் படைப்புகள் தமிழ் மொழிபெயர்ப்பில் கிடைக்கிறது. ஆனால், அதே அளவுக்குத் தமிழ் எழுத்தாளர்களின் படைப்புகள் ஆங்கிலத்திலோ அல்லது பிற ஐரோப்பிய மொழிகளிலோ கிடைக்கிறதா என்றால் இல்லை என்றே பதில் சொல்ல வேண்டியிருக்கிறது. ஒப்பீட்டளவில் பார்த்தால் ஆங்கிலத்திலிருந்து தமிழில் வருவதில் நூற்றில் ஒன்று அல்ல; ஆயிரத்தில் ஒரு சதவீதம் கூட தமிழ் நூல்கள் ஆங்கிலத்தில் செல்வதில்லை.

தமிழகத்துக்கு வெளியே தெரியாது

பல மொழி எழுத்தாளர்கள் கலந்துகொள்ளும் சர்வதேச எழுத்தாளர் கருத்தரங்குகளில் தமிழைப் பிரதிநிதித்துவப்படுத்துவதற்கு ஆட்களே இல்லை. ஆனால் இங்குள்ள ஒவ்வொரு எழுத்தாளரும் நூற்றுக் கணக்கான புத்தகங்களை எழுதியவர்களாகவும் சர்வதேசத் தரத்தில் எழுதுபவர்களாகவும் இருக்கிறார்கள். ஆனால், தமிழ்நாட்டுக்கு வெளியே அவர்கள் பெயர் தெரிவதில்லை. இந்தியின் நிர்மல் வர்மாவை நமக்குத் தெரிகிறது. மொழிபெயர்ப்பும் உள்ளது. ஆனால், இங்கே உள்ள அசோகமித்திரனை இந்தியில் தெரியாது. இவ்வளவுக்கும் அசோகமித்திரன் இந்தியாவே பெருமைப்பட வேண்டிய ஒரு மேதை. இலக்கியத்தில் அவர் அளவுக்கு சாதித்திருப்பவர்கள் உலக இலக்கியத்திலேயே கம்மி என்று சொல்லலாம். ஆனால், நமக்கே அவரைப் பற்றி அதிகம் தெரியவில்லை. அது மட்டும் அல்ல. நோபல் பரிசு பெறத் தக்க அளவுக்குத் தமிழில் ஒரு டஜன் பேருக்கு மேல் இருக்கிறார்கள். பெயரையும் சொல்ல முடியும். அசோகமித்திரன், சா. கந்தசாமி, ந. முத்துசாமி, ஆ. மாதவன், இந்திரா பார்த்தசாரதி, ஞானக்கூத்தன், தேவதச்சன், தேவதேவன், வண்ணநிலவன், மனுஷ்ய புத்திரன், எஸ். ராமகிருஷ்ணன், ஜெயமோகன், ஷோபா சக்தி, இளங்கோவன் (சிங்கப்பூர்) என்று பலர். இந்தப் பட்டியல் என்னுடைய தனிப்பட்ட ரசனை சார்ந்தது. சீரிய தமிழ் இலக்கிய வாசிப்பு இருப்பவர்களால் இந்தப் பட்டியலில் இன்னும் சிலரையும் சேர்க்க முடியும். இவர்கள் அனைவரும் இன்னமும் தீவிரமாக எழுதிக்கொண்டிருப்பவர்கள். பிரெஞ்சு மொழியைத் தவிர உலகின் வேறு எந்த மொழியிலும் இந்த அளவுக்கு சர்வதேசத் தரத்தில் படைப்புகள் உருவாகிக்கொண்டிருக்கவில்லை. உலக இலக்கியத்தைக் கூர்மையாக அவதானித்துக்கொண்டிருப்பவன் என்ற முறையில் இதை என்னால் அழுத்தமாகச் சொல்ல முடியும்.

ஆங்கிலம், தமிழ் வித்தியாசம்

இவ்வளவு பேர் இருந்தும், இவ்வளவு அதிகமாக எழுதியும் தமிழ்நாட்டுக்கு வெளியே ஏன் தமிழ் எழுத்து செல்லவில்லை? இரண்டு காரணங்கள். நம் பெருமையை நாமே சொன்னால்தானே அடுத்தவருக்குத் தெரியும்? சொல்வதற்கு யார் இருக்கிறார்கள்? தமிழ் அறிந்தோருக்கு ஆங்கிலம் தெரியவில்லை. ஆங்கிலம் தெரிந்தவர்களுக்குத் தமிழ் இலக்கியப் பரிச்சயம் அறவே இல்லை. இன்று நேற்று அல்ல; நூறு ஆண்டுகளாக இதே நிலைமைதான். உதாரணமாக, 1954-ல் நடந்த ஒரு சம்பவம். சுந்தர ராமசாமியின் ‘க.நா.சு. நினைவோடை’ என்ற அற்புதமான நூலில் இந்தச் சம்பவம் வருகிறது.

பிற மொழிகளில் எழுத்தாளர் நிலை

திருவனந்தபுரத்துக்கு வந்திருந்த க.நா.சு.வை நாகர்கோவில் ஸ்காட் கிறிஸ்டியன் கல்லூரிக்குப் பேச அழைக்கிறார்கள் சு.ரா.வும் கிருஷ்ணன் நம்பியும். ஆனால், அந்தக் கல்லூரிப் பேராசிரியருக்கு க.நா.சு.வைத் தெரியவில்லை. ஆனால் க.நா.சு. ‘தி இந்து’ (ஆங்கிலம்) நாளிதழில் மதிப்புரை எழுதும் விஷயம் ஞாபகம் வந்த சு.ரா. அதைப் பேராசிரியரிடம் சொல்கிறார். உடனே பேராசிரியர், “ஓ… கே.என்.எஸ்-ஸா? அதை முதலிலேயே சொல்லக் கூடாதா? நன்றாகத் தெரியுமே” என்கிறார். “ஹிண்டுவில் எழுதுவதென்றால் எவ்வளவு பெரிய ஆளாக இருக்க வேண்டும் என்று என்னை விட க.நா.சு.வைப் புகழ ஆரம்பித்துவிட்டார் பேராசிரியர்” என்கிறார் சு.ரா. ஆங்கிலத்துக்கும் தமிழுக்குமான இடைவெளியை இந்தச் சம்பவத்திலிருந்து நாம் புரிந்துகொள்ளலாம். ஆனால், பிற மொழிகளில் எப்படி இருக்கிறார்கள்?

இரண்டு ஆண்டுகளுக்கு முன்பு பிரான்ஸிலிருந்து ஒரு எழுத்தாளர் இந்தியா வந்திருந்தார். உடனே இந்தியாவின் எல்லா முக்கிய நகரங்களிலும் உள்ள அலியான்ஸ் ஃப்ரான்ஸேஸ் மற்றும் பிரெஞ்சைப் பாடமாக போதிக்கும் சர்வகலாசாலைகள் எல்லாவற்றிலும் அவருடைய கலந்துரையாடல் நடந்தது. மறுநாளே அது பற்றி தினசரிகளில் செய்தி வருகிறது. சென்னைப் பல்கலைக்கழகத்தின் பிரெஞ்சுத் துறையிலும் அவர் விரிவுரையாற்றினார். அவருடைய புத்தகத்தைப் புகைப்பட நகல் எடுத்து, ஒரு மாதத்துக்கு முன்பே மாணவர்களிடம் கொடுத்து, படித்துவிட்டுக் கலந்துரையாடலுக்கு வரச் சொல்லியிருந்தார்கள் பிரெஞ்சுத் துறை பேராசிரியர்கள். இவ்வளவுக்கும் அவர் எழுதியிருந்தது அந்த ஒரே ஒரு நூல்தான்.

பரிசுகளின் பயன்பாடு

தமிழ் அளவுக்கு இவ்வளவு தீவிரமாக இலக்கியச் செயல்பாடுகள் உலகின் பிற மொழிகளில் நடக்கவில்லை என்ற போதும் தமிழ் இலக்கியத்துக்கு இதுவரை ஒரு சர்வதேச விருது கூட வழங்கப்படாததற்குக் காரணம் வேறு யாரும் அல்ல; நாம்தான். உதாரணமாக, தாகூரை விடவும் கவிதையில் சிறந்த பாரதிக்கு ஏன் நோபல் கிடைக்கவில்லை? தாகூரின் கீதாஞ்சலி மொழிபெயர்ப்புக்கு அப்போது உலகப் புகழ் பெற்றிருந்த டபிள்யூ,பி. யேட்ஸ் முன்னுரை கொடுத்ததோடு மட்டுமல்லாமல் உலக அளவில் அதை அறிமுகமும் செய்தார். அதை எடுத்துக்கொண்டு தாகூர் சுமார் 30 நாடுகளுக்குச் சென்று அறிவுஜீவிகளிடமும் கவிகளிடமும் அறிமுகம் செய்துகொண்டார். தாகூருக்கு நோபல் கிடைத்தது 1913-ல். பாரதி இறந்த ஆண்டு 1921.

பரிசுகளின் பயன்பாடு என்னவென்றால், எந்த மொழிக்குப் பரிசு கிடைக்கிறதோ அந்த மொழியில் நடக்கும் இலக்கியச் செயல்பாடுகள் உலக அளவில் பிரபலமாகும். இலக்கியத்துக்கான நோபல் பரிசு தாகூருக்குப் பிறகு எந்த இந்திய எழுத்தாளருக்கும் கிடைக்காவிட்டாலும் பல சர்வதேசப் பரிசுகளை இந்தியாவின் பிற மொழிகள் வாங்கியிருக்கின்றன. குறிப்பாக இந்தி, வங்காளம், மலையாளம், கன்னட மொழிகள். சர்வதேச அளவில் தமிழ் இலக்கியம் பற்றிப் பேச ஆள் இல்லை. ஒருசிலரே இருந்தாலும் அவர்கள் சங்க இலக்கியத்திலிருந்து ஒரு அங்குலம்கூட நகர்வதாகத் தெரியவில்லை. அதேபோல் சமகாலத் தமிழ் இலக்கியத்துக்குச் சரியான ஆங்கில மொழிபெயர்ப்புகளும் இல்லை. அப்படியே கிடைத்தாலும் அது தரமான மொழிபெயர்ப்பாக இல்லை. எனவே இப்போதைய உடனடித் தேவை, ஆங்கிலத்திலிருந்து தமிழுக்கு மொழிபெயர்ப்பதை விட தமிழ் இலக்கியம் ஆங்கிலத்துக்கும் பிற ஐரோப்பிய மொழிகளுக்கும் செல்வதற்கான வழிவகைகள் காணப்பட வேண்டும். அதற்கான மொழிபெயர்ப்புக் குழுக்கள் அமைக்கப்பட வேண்டும். மேலும், எந்த மொழியில் மொழிபெயர்ப்பு நடக்கிறதோ அந்த மொழியைத் தாய்மொழியாகக் கொண்டவர்களும் அந்தக் குழுவில் பங்கேற்றிருக்க வேண்டும்.

நன்றி ;- தி இந்து

மீத்தேன் எதிர்ப்பு .- தேவை மரபு மாறா மனிதர்கள் - மருதம் கோகி

காவிரி டெல்டாவை மிகப் பெரும் அச்சம் சூழ்ந்திருக்கிறது. முப்போகம் நெல் விளைந்த தஞ்சை பூமியின் அடையாளம் கொஞ்சகொஞ்சமாய் மாறிவருகிறது. பெட்ரோலியம் உள்ளிட்ட இயற்கை வளங்கள், அங்கு வாழ்ந்துகொண்டிருக்கும் மக்களுக்குக் கேடாய் மாறியிருக்கின்றன.

பெட்ரோலிய எண்ணெய் தோண்டியெடுப்பதற்காக அந்த மண்ணில் ஓ.என்.ஜி.சி. ஆரம்பத்தில் காலடி எடுத்து வைத்தது. இப்போது மீத்தேன் வாயு, ஷேல் காஸ் என அங்கு பூமியை பிளந்தெடுத்து வாரி அள்ளிச் செல்வதற்கான நடவடிக்கைகள், அந்த மண்ணைப் பாலைவனமாக மாற்றிவிடுமோ என்ற அச்சத்தில் அப்பகுதி மக்கள் ஆழ்ந்துள்ளனர்.

இந்த அச்சமே மக்களைப் போராட்டக் களத்தில் இறக்கியுள்ளது. இந்தப் போராட்டங்கள் தொடங்கியது எப்படி என்பதை மருதம் கோகி எழுதியுள்ள இந்த நூல் விவரிக்கிறது.

மன்னார்குடி பகுதியில் நிலக்கரி படிமம் கண்டுபிடிப்பு, நிலக்கரி படிமங்களுக்கு இடையில் மீத்தேன் இருப்பது கண்டுபிடிப்பு, அந்த மீத்தேனை எடுக்க மத்திய, மாநில அரசுகளுடன் தனியார் நிறுவனம் ஒப்பந்தம் செய்துகொண்டது என இந்த நடவடிக்கையின் ஒவ்வொரு கட்டத்தையும் மருதம் கோகி தனது நூலில் பதிவு செய்துள்ளார்.

மக்களின் எதிர்ப்புகளைப் புறந்தள்ளி மத்திய சுற்றுச்சூழல் அமைச்சகம் திட்டத்துக்கு அனுமதி அளித்தது. அதன் தொடர்ச்சியாக விவசாயிகள் சங்கத் தலைவர் மன்னார்குடி எஸ். ரங்கநாதன் ஏற்பாட்டில் தஞ்சாவூரில் நடைபெற்ற கருத்தரங்கம் மீத்தேன் திட்டம் குறித்த முழுமையான புரிதலை ஏற்படுத்தியது. மீத்தேன் திட்டத்தை ரத்துசெய்யக் கோரி சென்னை உயர் நீதிமன்றத்தில் வழக்கு தாக்கலானது. நெருப்பாய்க் கனன்றுகொண்டிருந்த போராட்டம் நம்மாழ்வாரின் வருகைக்குப் பிறகு பற்றி எரியத் தொடங்கியது. மீத்தேன் போராட்டக் களத்திலேயே நம்மாழ்வாரின் உயிரும் பிரிந்தது. போராட்டத்தை மேலும் எழுச்சி பெற்றது.

2014 நாடாளுமன்றத் தேர்தலில் தஞ்சை தொகுதியின் மையப் பிரச்சினையாக மீத்தேன் விவகாரம் உருப்பெற்றது. வலுவான மக்கள் இயக்கங்களால் மீத்தேன் திட்டம் தற்போது தற்காலிகமாக முடக்கி வைக்கப்பட்டுள்ளது. இந்த எல்லா நிகழ்வுகளின் வரிசைக் கிரமமான தொகுப்பாக மருதம் கோகியின் இந்த நூல் திகழ்கிறது.

மீத்தேனைத் தொடர்ந்து தற்போது அதைப் போலவே பல லட்சம் கோடி லாபத்தைக் கொடுக்கக்கூடிய ஷேல் கேஸ் மீதும் பன்னாட்டுப் பகாசுர கம்பெனிகளின் கண்களில் பட்டுவிட்டன. ஆனால், மக்கள் சக்தி ஒன்றுதிரண்டால் எந்த சக்தியையும் முறியடிக்க முடியும். அத்தகைய மக்கள் சக்தியின் போராட்டத்துக்கு உந்துசக்தியாகவும் இந்த நூல் இருக்கும் என்பது நிச்சயம்.

- வி. தேவதாசன்

நன்றி :- தி இந்து

மாதொருபாகன் படைப்பாளி பெருமாள் முருகனிடம் சிறப்புப் பேட்டி - அ.ப.இராசா

மாதொருபாகன்' நாவல் தொடர்பாக எழுந்த சர்ச்சை, தற்போது விஸ்வரூபம் எடுத்து உள்ளது. 

தமிழகத்தில், ஓரு எழுத்தாளனை கண்டித்து, கடையடைப்பு நடப்பது இதுவே முதல்முறை. ஏன் இந்தியாவில் கூட, இதுவே முதல்முறையாக கூட இருக்கலாம். அடிப்படைவாதிகளின் கூடாரமாக, தமிழகம் மாறி வருகிறதோ என்று நினைக்கும் அளவுக்கு, நாவல் எரிப்பு, கடையடைப்பு போன்ற சம்பவங்கள் நடந்து வருகின்றன. பல்வேறு மிரட்டல்களால், நாமக்கல்லை விட்டு வெளியேறி உள்ள எழுத்தாளர் பெருமாள் முருகன், தமிழகத்தில் அகதியை போல் அலைந்து வருகிறார். 

அவருடன் பேசியதில் இருந்து.....

உங்களை எதிர்த்து நடக்கும் இந்த போராட்டங்களின் பின்னணியில் இருப்போர் யார்? 

துவக்கத்தில், இந்து முன்னணியின் பின்னணி இருந்தது. என்னை கைது செய்யக் கோரி, காவல் நிலையத்தில் கொடுக்கப்பட்ட நான்கு புகார்களில், இந்து முன்னணியின் புகாரும் ஒன்று. ஆர்.எஸ்.எஸ்., அமைப்பு, நூலை தீயிலிட்டு எரித்தது. எங்களுக்கும் இந்த சம்பவத்துக்கும் தொடர்பில்லை என்று தலைமை அறிவித்தவுடன், இந்த அமைப்புகள் வெளிப்படையாக இயங்காமல், பின்னணியில் இருந்து இயக்கி கொண்டிருக்கின்றன. இன்று வரை மிரட்டல்கள் நின்றபாடில்லை.

என்ன மாதிரியான மிரட்டல்கள் வருகின்றன?

முதலில், தொலைபேசியில் மிரட்டல் விடுத்தனர். பின், இடதுசாரி அமைப்புகள் எனக்கு ஆதரவாக போராட முன் வந்தபோது, கொஞ்சம் பின்வாங்கினர்.கூட்டங்கள் நடத்தி, எழுதிய கைகளை வெட்டுவேன், கொலை செய்வேன் என, போராட்டங்களில் மிரட்டல் விடுத்தனர். திருமாவளவன், ஈ.வி.கே.எஸ்., இளங்கோவன், நல்லகண்ணு, ராமகிருஷ்ணன் போன்ற தலைவர்கள் அறிக்கை விடுத்த பின், சட்டரீதியாக நடவடிக்கை எடுக்க கோரிக்கை விடுத்துள்ளனர். 

நாவலின் குறிப்பிட்ட பகுதி, மக்களிடம் எப்படி சேர்க்கப்பட்டது? நாவல் இலவசமாக வினியோகிக்கப்பட்டதா?

இந்த பிரச்னை குறித்து, தனியாக துண்டு பிரசுரங்கள் தயாரித்தனர்.அதில், நாவலின் குறிப்பிட்ட பகுதியை மட்டும் பிரசுரித்து, 'நம் ஊரையும், பெண்களையும், இந்து மதத்தையும் கேவலப்படுத்தி உள்ளார்' என, திட்டமிட்டு பிரசாரம் நடத்தினர். 16 பக்கங்கள் கொண்ட, 10 ஆயிரம் துண்டு பிரசுரங்களை, வீதி வீதியாக வழங்கினர்.நாவலின் குறிப்பிட்ட பகுதியை மட்டும் படித்தால், கேவலப்படுத்தியது போன்றே தோன்றும். இது எல்லா எழுத்தாளர்களுக்கும் பொருந்தும். இந்த வகையில், ஜாதியையும், மதத்தையும் ஒருங்கிணைத்து, திட்டமிட்டு செயல்படுகின்றனர்.

நாவலில் இருந்து ஊரின் பெயரை நீக்குவதாக அறிவித்த பின்னரும், போராட்டங்கள் நாளுக்கு நாள் தீவிரமடைந்து வருகிறதே. இதை எப்படி எதிர் கொள்ளப் போகிறீர்கள்? 

மத்தியில், பா.ஜ.,ஆளுவதால், மதங்களை முன்னிறுத்தி இந்தப் போராட்டங்கள் நடந்து வருகின்றன. நாவலில் இருந்து ஊர் பெயரை நீக்குவதாக விளக்கம் கொடுத்த பின்பும், போராட்டங்கள் தொடர்வதால், அவர்கள் முடிவுகளை முன்கூட்டியே தீர்மானித்து, அதன் வழியில் செல்வது போல தோன்றுகிறது. அதை தமிழக காவல்துறையும் வேடிக்கை பார்க்கிறது. ஜெயலலிதா மட்டும் முதல்வராக இருந்திருந்தால், இந்தப் பிரச்னையை வேறுவிதமாக கையாண்டிருப்பார்.

எழுத்தாளர்கள் குரல் எழுப்ப வேண்டும்! காலச்சுவடு பதிப்பக உரிமையாளர் கண்ணன் கூறியதாவது:இது, கருத்து சுதந்திரத்துக்கு எதிரான நடவடிக்கை. நாவல் வெளியாகி, நான்கு ஆண்டுகள் கழித்து, போராட்டங்கள் நடத்துவதும், எழுத்தாளனை கைது செய்ய வேண்டும் என கோருவதும், உள்நோக்கம் கொண்டவை.

நாவலுக்கு ஆதரவாக, பல்வேறு இயக்கங்கள், போராட்டம் நடத்துவதற்கு அனுமதிக்காத காவல்துறை, எதிர்தரப்பினர் நடத்தும் போரட்டங்களுக்கு தடை விதிப்பதில்லை. இதன் பின்னணியை ஆராய வேண்டும். இதற்கு எதிராக, எழுத்தாளர்கள் ஒருமித்த குரல் எழுப்ப வேண்டும். 

இன்று அமைதி பேச்சு: நாமக்கல் மாவட்டம் திருச்செங்கோட்டைச் சேர்ந்தவர், பெருமாள்முருகன்; அரசுக் கல்லூரி பேராசிரியர் மற்றும் நாவலாசிரியர். நாமக்கல், மோகனூர் சாலையில், குடும்பத்துடன் வசித்து வருகிறார். நான்காண்டுக்கு முன், அவர் எழுதிய, 'மாதொருபாகன்' என்ற நாவல், தற்போது சர்ச்சையை ஏற்படுத்தியுள்ளது. 

திருச்செங்கோட்டைச் சேர்ந்த சிலர், மொபைல் போன் மூலம் மிரட்டல் விடுத்தனர். கடந்த 9ம் தேதி, திருச்செங்கோடு நகரில் கடையடைப்புபோராட்டம் நடந்தது. பல அமைப்பினரும், சில அரசியல் கட்சிகளும், பெருமாள்முருகனுக்கு எதிராக கருத்து தெரிவித்து, போராட்டங்களை அறிவித்து வருகின்றன. 'திருச்செங்கோடு அர்த்தநாரீஸ்வரர் சுவாமி, தேர்த்திருவிழா, பெண்கள் ஆகியோரை கேவலமாகச் சித்தரித்து எழுதியதாக, பெருமாள் முருகனை கைது செய்ய வேண்டும். அவரது, 'மாதொருபாகன்' புத்தக விற்பனையை தடுக்க வேண்டும். விற்கப்பட்ட புத்தகங்களை திரும்ப பெற வேண்டும். பகிரங்க மன்னிப்பு கேட்க வேண்டும்' என்பது உள்ளிட்ட கோரிக்கைகளை சிலர் முன் வைத்துள்ளனர். இந்நிலையில், '

தினமலர்' நாளிதழில், 'இந்த பிரச்னையை, சில அரசியல் கட்சிகள் கையில் எடுத்துக் கொண்டு ஆதாயம் தேடி வருவதாகவும்; மாவட்ட நிர்வாகம், எவ்வித நடவடிக்கையும் எடுக்கவில்லை' என, செய்தி வெளியானது. அதையடுத்து, நாமக்கல்லில் உள்ள பெருமாள்முருகன் வீட்டிற்கு, நேற்று காலை முதல் போலீஸ் பாதுகாப்பு போடப்பட்டுள்ளது. மாவட்ட நிர்வாகம், இப்பிரச்னையைத் தீர்க்க, இன்று மாலை, மாவட்ட வருவாய் அலுவலர் சுப்புலட்சுமி தலைமையில், திருச்செங்கோட்டை சேர்ந்தவர்களுடன் அமைதி பேச்சு நடத்த ஏற்பாடு செய்துள்ளது.

நன்றி :- தினமலர், 12-01-2015

நான்கு ஆண்டுகளுக்கு முன்பு எழுதப்பட்ட பெருமாள் முருகனின் மாதொருபாலன் நாவலுக்கு இந்து ஆங்கில நாளிதழில் வந்த செய்தி !

COMMENT (20)   ·   PRINT   ·   T  T  

inShare1

20

Special Arrangement

Members of Hindu outfits burn copies of the book, ‘Madhorubagan’, in Tiruchengode on Friday.

They allege it portrays Kailasanathar temple and women devotees in bad light

Alleging that Tamil writer Perumal Murugan’s novel, Madhorubhagan, has portrayed the Kailasanathar temple in Tiruchengode and women devotees in bad light, the BJP, RSS and other Hindu outfits have demanded its ban and the arrest of the author. They burnt copies of the book on Friday at Tiruchengode.

The book has been translated and published in English as One Part Woman by Penguin India and it had seen two editions.

Mr. Murugan, an author of seven novels and a dictionary of dialects of the Kongu (western) region of Tamil Nadu, has filed a complaint with the Superintendent of Police seeking protection for him and his family members. “In the last 20 days, I have been receiving calls abusing me. It has disturbed me a lot. On Thursday, a group of people visited my house and wanted a copy of the book,” Mr. Murugan, who works as a Tamil Professor at the Government Arts College in Namakkal, told The Hindu.

Madhorubagan, Tamil equivalent of Ardhanareeswarar, the presiding deity of Tiruchengodu temple, revolves around childless couple Kali and his wife, Ponna. Their predicament is discussed in the backdrop of the “traditional free, consensual sex rituals” held once in a year during the car festival of the temple in the past. Kali resists attempts to make his wife to participate in the ritual, but in the end he is shattered when he finds her missing from home.

Kannan, publisher of Kalachuvadu, which had published the book in 2010, said though many communities were embarrassed by certain aspects of their history and culture that could not fit in with their present day middle class values, no creative writer could obey the dictums of ‘fascist forces.’ “Kalachuvadu will stand by Perumal Murugan. Tamil intellectuals must get together and face this challenge,” he said.

Bid to take out march

On Friday, more than 50 cadres, led by Tiruchengode town RSS president Mahalingam, raised slogans and tried to take out a march from the foothills of the temple to the police station. But they were stopped by Deputy Superintendent of Police Ramasamy, who asked them to prefer a complaint with the local police station. While initially their attempt to burn copies of the book was thwarted by the police, they later succeeded in doing so in front of the local police station.

In their petition, the BJP, RSS and other Hindu outfits said that in many pages the author had denigrated Lord Shiva and the women devotees who visited the temple during the car festival. The cited the narratives in pages, 87, 116, 117, 118, 129 and 172 of the book were in bad taste. They demanded the arrest of both the author and the publisher.

B. KOLAPPAN

S. P. SARAVANAN